مبنسمعش كويس يعني أيه ؟؟ هو إحنا طرش يعني ولا أيه ؟؟

طول عمرنا بيعلمونا إزاى نتكلم ..و نقرا ..و نكتب و محدش بيعلمنا إزاى نسمع
أنا شايف أن فيه فرق كبير مابين أننا نسمع بجد و أننا مجهزين الرد ومستنين
اللى قدمنا يخلص كلام علشان أقول اللى أنا عايز أقولة و خلاص.

أحد أصدقائى قالى الجمله دى ، وفكرت فيها كتير بصراحه
و لما فكرت فيه لقيت كلامه صح فعلاً تلاقيهم بيعلموك ويقولوا يلا يا
حبيبي ، قول بابا ، دح ، كخ ، تف على عمو يا حبيبى ، قوم ذاكر يا ولد ،
لكن نسيوا يعلمونا إزاي نسمع نفسنا عشان نتعلم بعد كده نسمع غيرنا ونسمعهم
ونفهمهم صح , .....و لما حاولوا يخلونا نسمع المدرس فى الفصل كانوا
بيخلونا نقعد زى تماثيل اسكندريه " اللعبه المشهوره " و
المدرس يقف يجيب من قلبه و إحنا ولا إحنا هنا كل اللي بنفكر فيه يا ترى
العيال اللى ضربناهم فى الفسحه إمبارح هييجوا يخلصوا طارهم النهارده ؟؟[/size]

عندنا هنا مشكلتين فى السمع :
المشكله الأولى :أن إحنا مبنسمعش كويس و للآخر
،.... و المشكله التانية :حاجه اسمها الآراء المسبقه

مبنسمعش كويس يعنى ايه ؟ طرش إحنا يعنى ؟؟؟!!!
مبنسمعش كويس يعنى..... أجهزة الأستقبال بتاعتنا مش مظبوطه كويس على الموجه بتاعة
اللى بيتكلم ، وده لأسباب كتير ، منها .أن ساعات و حد بيكلمنى فى موضوع
مهم ببقى مش مركز معاه و بلعب فى الموبايل و برد على رساله من واحد صاحبى
بيهنئنى فيها بفوز الأهلى على مركز شباب كفر مأمون ، مرات كتير قوى بنبقى
قاعدين فى مكان عام و فى وسط كلام الراجل بشاور للجرسون و أقوله فين الشاى
يا عم ، و أحياناً تانيه كتير ببقى مدور وشى و ببص على واحده حلوه عجبانى
قاعده مع واحد بتشبشبه و بفكر فى سرى " يدى الحلق للى بلا ودان "
، وعمرى ما أخدت بالى إنى أنا نفسى بلا ودان لأنى مش سامع اللى بيكلمنى و
أكبر كارثه عملتها إنى مره أخدت منديل و لمعت الشوز و صديقى كان بيشتكيلى
من أزمه كان بيمر بيها ، وساعات تانيه بيبقى اللى معايا بيشرحلى حاجه وأنا
مش فاهمها و بهز دماغى زى الواد " عاطف السكرى " علشان غرورى و تكبرى مش سامحلى أقوله بتعابير وشى إنى مش فاهم

النتيجه المباشره بتكون إنى مفهمتش حاجه من كلام الراجل و بضطر أسأله فى حاجات هو لسه قايلها دلوقتى حالاً
و النتيجه غير المباشره إنى ضيعت وقته و وقتى و إنه أساساً مش هيضيع وقته معايا تانى لأن محدش بيعرف يكلم أطرش إلا لو اتعلم لغة الإشاره

: المشكله التانيه وهى الآراء المسبقه أو اتخاذ المواقف المسبقه
بالبلدى كده يعنى رايح ومستنى الراجل يقول كذا علشان أعمل فيها فنط و أقوله لأ ده أنا قريت امبارح فى كتاب مصطفى اسمه إيه ده إن اللى انت بتقوله ده كلام نظرى ومش مظبوط
أو إنى أكون أساساً من الأول محدد موقف هاخده فى النهايه بغض النظر عن نتيجة الحوار اللى هيحصل
ورايح يا قاتل يا مقتول يعنى يا هقنعه بوجهة نظرى يااااا هقنعه بوجهة نظرى
ده على أساس إن أنا بس اللى بفهم و الباقى سلطة كرنب
وده برغم ان فيه احتمال كبير أكون أنا اللى غلط وده قاله من سنين طويله الإمام الشافعى
رأينا صواب يحتمل الخطأ و رأى الآخرين خطأ يحتمل الصواب
بس ده مش معناه إنى فى مستوى الإمام الشافعى ولو قارنت نفسى بالإمام الشافعى يبقى رأيى أنا
خطأ يحتمل الصواب ورأى الآخرين صواب يحتمل الخطأ

وبعد تفكير عميق جداً و تشغيل بريمة المخ حتى وصلت لقاع العين ...،
و بعد مداولات مع نفسى و أربع حبوب بنادول من الأحمر ده ... و فنجان قهوه وقزازة ببس ،
متسألنيش أزاي ولكن ... وصلت للآتى وقلت لنفسى فى عقل بالى
ياواد ما تتعلم تسمع الناس للآخر من غير ما تقاطع , و فكر قبل ما ترد عليهم
و احترم نفسك كده و متتريقش على كلامهم خصوصاً لو كانوا بيتكلموا فى موضوع
مهم ،.... ما تحترم نفسك كده و تثبت تعابير وشك و هما بيكلموك ولو القهوه
اللى بتشربها مش عاجباك بلاش تعقد حواجبك و تقول إيه القرف ده ،.. بطل
تقاطع اللى قدامك ويا سيدي بلاها القهوه خالص ، فيه حاجه تانيه لما يكون
وقت سكوت أسكت بمعنى : لو اديت لحد ورقه يقراها استنى لما يقراها اديله
فرصه مش تقوله شوف الحته دى و تمد صباعك على الورقه و أساساً إيدك حاجبه
الورقه عنه ، ...ما هو ممكن يرمى الورقه على الأرض و يقولك أقراها أنت
بقى وساعتها هايبقي عنده حق ، بصيت فى المرايه بالجنب لقيت شكلى أحول و
لقيت إنى لو بصيت للى بيكلمنى بوشى كله هيبقى شكلى أحسن بكتير فقررت إنى
أبص بوشى كله لأن البروفيل بتاعى معجبنيش ( مش حسين فهمى يعنى ) ...، قررت
إنى بلاش أعترض إلا لما اللى قدامى يخلص كلام ولو مفهمتش حاجه من كلامه
أعقد حاجبينى و ابتسم أبتسامة كسوف معناها أنا حمار و النبى فهمنى

واكتشفت اكتشاف مذهل.. إنى لما أقابل حد عايز أسمعه كويس من الأفضل مقابلهوش فى قهوه زحمه ,و الأفضل برضه مش فى كباريه .

بالمناسبه أنا قفلت موبايلى لأنى مش طايق أسمع صوت حد ، محدش يكلمنى انا بحذركم وقد أزعر من فذعر

- من دورة التنمية البشريه (جزء فن الاستماع) أحمد سمير
- نشرت فى مجلة بحلقة الالكترونيه فى 16ديسمبر 2008

هو اولا موضوع جميل جدا جدا وفعلا من الواقع وحاجة موجودة فى مجتمعنا عامة
هو ساعات فعلا ما بسمعش اصلا للموضوع بس دى فى حالة لما يكون موضوع متكرر ومثلا صحبتى هتكلمنى فيه تانى
يبقى مالهاش لازمة لكن لما بيكون موضوع جد وشاددنى بسمع طبعا لانى ببقى مشدودة انى اعرف زى ما تخش ع موضوع وموضوع لا دخولنا عليهم بيبقى حسب اسم الموضوع يا يشدنى او ما يشدنيش
وطبعا مش معنى كلامى ده انك غلط لا انت فعلا صح
وشكرا للموضوع الجميل ده

شكرا على تعليقك الجميل سندريللا

اولا الموضوع جميل